CHE FACCIO…

ŠCOLA > Faccio ‘o prufessore ‘e Lettere ‘int’’a šcola media “Antonio Sogliano”, ca se trova ‘int’’o quartiere Vecarìa ‘e Napule. Arint’’a “Sogliano” faccio pure ‘a “funzione strumentale” pe’ “disagio e dispersione” e pirciò stongo accupato cu’ ‘e guagliune ca nun teneno genio ‘e studià, ca teneno prubbleme a sta’ a šcola, o ca manco ‘a prattecano. ChIst’anno tengo ‘na primma classe (addò imparo ê guagliune sulo ‘o Taliano) e ‘na terza, c’aggi’ ‘a purtà a l’esame ‘e licenzia media. ‘Int’’a “Sogliano” songo pure ‘o “referente” pe’ l’Aducazzione p’’a Pace e st’anno aggio pigliato parta a ‘nu pruggetto d’’o Cummune ‘e Napule (chiammato “Peacemaker a Scuola”), pe’ furmà maeste e aducatùre capace ‘e purtà ‘int’’a šcole noste ‘e valùre d’‘a Pace, d’‘e Deritte ‘e l’Ummanetà e d’‘a Deverzetà d’’e Cculture.

ECOLOGGIA > Pe’ chiù ‘e diece anne aggio fatto ‘o coordinatore d’’o Circulo ‘e Napule ‘e l’Assuciazzione Abbientalista V.A.S. (Verdi Ambiente e Società) . D’’o 2008 me stongo accupanno sulo d’’a Cultura p’’o Coordinamento d’’e Circule VAS d’’a reggione Campania (VAS-Campania). Pecchesto songo ‘o coordinatore d’’o pruggetto “UniversiVàs di Napoli” (‘na sequènzia ‘e semmenarie ‘ncopp’’a l’Ecologgia Suciale, l’Eco-pacifisemo e ‘a Biodiverzetà).

PACE > Comme viecchio obbiettore ‘e cuscienzia - antimilitarista e nunviulento – me song’accupato pe’ ‘nu sacco d’anne ‘e pace, desarmo e defesa nunviulenta. A ‘sti tiempe stongo faticanno špeciarmente comme “referente p’’o Eco-pacifisemo ‘e VAS e cullabboro pure cu PeaceLink e Pax Christi . Comm’ aducatore p’’a pace, stongo appriparanno ‘nu manuale pe’ l’“aducazzione lenguisteca nunviulenta” (Grammateca ‘e Pace) e aggio tradutto ‘nNapulitano ‘nu paro ‘e articule p’’a Wikipedia napulitana (Nunviulenza e Aducazzione p’’a Pace).

SUGGITA’ > Nun faccio chiù l’assistente suciale ‘a nu sacco d’anne, però nun aggio maje fernuto e me ‘mpignà int’’e prubbleme suciale e p’’o žveluppo d’’a cummunetà. ‘Int’’a šcola faccio l’operatore aducativo-suciale e stongo ancora ‘int’’o cunziglio gennerale d’’a FOCS (Funnazzione “Casa d’’o Šcugnizzo), ‘a stòreca istituzzione ‘e Materdei, criata ‘a Mario Borrelli ‘o 1950.

RELIGGIONE > Comme cristiano, me so’ sempe accupato d’’e quistione d’’a giustizia, d’’a pace e d’’a prutezzione d’’o criato, siconno ‘na manera evangeleca e francišcana. ‘Ncopp’a chesta “eco-teologgìa” aggio šcritto ‘nu paro ‘e saggie e stongo pure traducendo int’’a lengua napulitana ‘o Libbro d’’e Sarme (Tehillìm), partenno d’’o testo ebbraico. ‘Nziem’a muglierema Anna – ca ‘nzegna religione – songo “operatore pastorale” ‘int’’a Parrocchia d’’a mia, Santa Maria d’’a Libbera, ‘ncopp’’o Vommero.